इम्रान जाफर शेख यांची लोहमार्ग पोलीस पदावर निवड; तरुणांसाठी ठरले प्रेरणास्थान
मानवत / प्रतिनिधी
इम्रान जाफर शेख रा. इसाद, ता. गंगाखेड, जि. परभणी यांची छत्रपती संभाजीनगर येथील लोहमार्ग पोलीस पदावर नुकतीच निवड झाली आहे. त्यांच्या या यशामुळे कुटुंबासह संपूर्ण परिसरात आनंदाचे वातावरण निर्माण झाले आहे.
अत्यंत सामान्य कुटुंबातून येणाऱ्या इम्रान जाफर शेख (वय १९) यांनी लहानपणापासूनच शिक्षणाबरोबरच स्पर्धा परीक्षांची तयारी सुरू ठेवली होती. मर्यादित साधनसामग्री असूनही त्यांनी कधीही हार न मानता सातत्याने परिश्रम घेतले. दिवस-रात्र मेहनत, शिस्तबद्ध अभ्यास आणि आत्मविश्वास यांच्या जोरावर त्यांनी हे यश मिळवले आहे.
इम्रान यांनी कोणत्याही प्रकारच्या क्लासेसवर अवलंबून न राहता स्वतःच्या जिद्दीच्या बळावर अभ्यास केला. कठीण परिस्थितीतही त्यांनी आपले ध्येय डोळ्यासमोर ठेवत अभ्यासाची गती कायम राखली. त्यांच्या या चिकाटीमुळेच त्यांना लोहमार्ग पोलीस पदापर्यंत पोहोचता आले.
त्यांच्या या यशामुळे गावातील इतर तरुणांमध्येही स्पर्धा परीक्षांबाबत उत्साह निर्माण झाला आहे. "परिस्थिती कशीही असली तरी मेहनत आणि आत्मविश्वास असेल तर यश निश्चित मिळते," हे त्यांनी आपल्या कृतीतून सिद्ध केले आहे.
इम्रान जाफर शेख यांच्या निवडीबद्दल नातेवाईक, मित्रपरिवार तसेच गावकऱ्यांकडून त्यांचे अभिनंदन करण्यात येत असून, त्यांच्या पुढील वाटचालीसाठी शुभेच्छांचा वर्षाव होत आहे. या यशाबद्दल त्याचे चुलते पो. ना. शेख रसुल यांनी सत्कार करत शुभेच्छा दिल्या आहे.
