परभणी शहरातील जिंतूर रोडवरील बॅरिकेट्स हटवण्याची नगरसेवकांची मागणी

परभणी शहरातील जिंतूर रोडवरील बॅरिकेट्स हटवण्याची नगरसेवकांची मागणी

परभणी / प्रतिनिधी

परभणी शहरातील जिंतूर रोड येथील जांब नाका दर्गा कमान समोरील मुख्य रस्त्यावर शहर वाहतूक सुरक्षा पोलिसांकडून लावण्यात आलेले बॅरिकेट्स तात्काळ हटवावेत, अशी मागणी दर्गा रोड प्रभाग क्रमांक ११ परभणी महानगरपालिकेतील नगरसेवकांनी पोलिस अधीक्षकांकडे निवेदनाद्वारे केली आहे.

नगरसेवकांनी दिलेल्या निवेदनात म्हटले आहे की, जिंतूर रोडवरील जांब नाका दर्गा कमान समोरील रस्त्यावर लावण्यात आलेल्या बॅरिकेट्समुळे वाहतुकीस मोठ्या प्रमाणात अडथळा निर्माण होत आहे. सदर रस्ता हा सरकारी दवाखान्याकडे जाणारा महत्त्वाचा मार्ग असल्यामुळे रुग्णवाहिका तसेच रुग्णांना दवाखान्यात ये-जा करण्यास अडचणी निर्माण होत आहेत.

तसेच दर्गा रोड परिसरातील नागरिकांसाठी हा मुख्य मार्ग असून परिसरातील अनेक रस्त्यांचे काम सुरू असल्यामुळे वाहतुकीचा ताण वाढला आहे. त्यामुळे नागरिकांना मोठ्या प्रमाणात गैरसोय सहन करावी लागत आहे.

यामुळे सदर ठिकाणी लावण्यात आलेले बॅरिकेट्स तात्काळ हटवून वाहतुकीसाठी रस्ता मोकळा करावा, अन्यथा लोकशाही मार्गाने आंदोलन करण्याचा इशाराही देण्यात आला आहे.

या निवेदनावर इनामदार नदिम अहमद, शमशाद बेगम सय्यद इलाही राज, जाकीरा बेगम मोहम्मद नईमुद्दीन, रुखसाना बेगम सय्यद अब्दुल हमीद जागीरदार आणि खान मुसदिक नुरुल्ला खान यांच्या स्वाक्षऱ्या आहेत.