मानवत शहराला विकास निधी कमी पडू देणार नाही – खासदार श्रीकांत शिंदे

मानवत शहराला विकास निधी कमी पडू देणार नाही – खासदार श्रीकांत शिंदे

[] मानवत येथे शिवसेना–भाजप युतीची शक्तिप्रदर्शन सभा []

मानवत /  प्रतिनिधी

मानवत नगरपरिषद सार्वजनिक निवडणूक  च्या पार्श्वभूमीवर शिवसेना–भाजप महायुतीच्या प्रचाराला वेग आला असून नगराध्यक्ष पदाच्या उमेदवार सौ. अंजली महेश कोक्कर व नगरसेवक पदाच्या सर्व उमेदवारांच्या प्रचारार्थ दिनांक २७ नोव्हेंबर रोजी मानवत शहराच्या मेन रोडवर भव्य जाहीर सभा आयोजित करण्यात आली होती .

सभेच्या अध्यक्षस्थानी शिवसेना नेते खासदार डॉ. श्रीकांत शिंदे, सामाजिक न्याय मंत्री संजय शिरसाट, शिवसेना शिंदे गटाचे अल्पसंख्यांक महाराष्ट्र अध्यक्ष सईद उर्फ गब्बर खान, भाजपा जिल्हाध्यक्ष सुरेश भुमरे, शिवसेना शिंदे गटाचे ज्येष्ठ नेते आनंद भरोसे, पक्ष निरीक्षक आनंद जाधव व पॅनल प्रमुख बालाजी कुऱ्हाडे आदी मान्यवर उपस्थित होते.

सभेची सुरुवात सर्व मान्यवरांच्या हस्ते महापुरुषांच्या प्रतिमांचे पूजन करून करण्यात आली. त्यानंतर महायुतीतर्फे तयार करण्यात आलेल्या निवडणूक जाहीरनाम्याचे प्रकाशन प्रमुख पाहुण्यांच्या हस्ते संपन्न झाले.

या सभेत आनंद भरोसे, नगराध्यक्ष पदाच्या उमेदवार सौ. अंजली महेश कोक्कर यांनी आपले मनोगत व्यक्त केले. मानवत शहरातील विकासकामे वेगाने करण्यासाठी स्थिर सत्ता आवश्यक असल्याचे ते म्हणाले.

यानंतर भाजपा जिल्हाध्यक्ष सुरेश भुमरे, सौ. प्रेरणा वरपूडकर, सामाजिक न्यायमंत्री संजय शिरसाट यांनीही महायुतीचे भक्कम नेतृत्व, विश्वासार्ह विकासनियम व पारदर्शक प्रशासन यावर भाष्य करत नागरिकांना परिवर्तनासाठी मतदान करण्याचे आवाहन केले.

मुख्य पाहुणे खासदार डॉ. श्रीकांत शिंदे यांनी आपल्या प्रभावी भाषणात मानवत शहराच्या सर्वांगीण विकासासाठी पूर्ण पाठबळ देण्याचे स्पष्ट आश्वासन दिले.

ते म्हणाले,महायुतीचे उमेदवार विजयी झाल्यानंतर मानवत शहराच्या पाणीपुरवठा, रस्ते, गटारे, आरोग्य सुविधा, क्रीडा संकुल अशा सर्व पायाभूत सुविधांसाठी आवश्यक त्या सर्व निधीची कमतरता भासणार नाही. मानवतचा विकास ही आमची जबाबदारी आहे.

त्यांनी मानवत शहराला मोठ्या प्रमाणात निधी आणण्याचे आश्वासन देत मानवत शहराला निधी कमी पडू देणार नाही अशी ग्वाही देत नागरिकांना युतीच्या उमेदवारांना विजयासाठी साथ देण्याचे आवाहन केले.

सभेला महिला, युवक, व्यापारी, विविध समाजघटकांकडून उत्स्फूर्त प्रतिसाद मिळाला. भगवे झेंडे, घोषणाबाजी आणि उत्साही कार्यकर्त्यांच्या उपस्थितीमुळे संपूर्ण मेन रोड दुमदुमला होता.

सभेनंतर मानवत शहरातील निवडणुकीची रंगत आणखी चढली असून प्रभागनिहाय चर्चा, मतदारसंघातील समीकरणे आणि युतीच्या शक्तिप्रदर्शनामुळे शहरात राजकीय वातावरण अधिकच तापले आहे.